L'FLAMIQUE À POÉRIONS

Prindez chinq chint granmes éd frinne, chint granmes éd beurre, chint granmes éd sain, un œu pi un dmi vérre d'ieu. Pétrichez, étindez vo pate au rouloér sur inne couche assez finne din inne tortiére graissa d'façon qu'cho'p pate al déborde largémint.
Oz avez éplutcha dvant chés poérions in inlvant chés bouts vérts éd chés feuilles pi oz avez copa in piots morcieux d'un chintiméte 1/2 à deux chintimétes chés parties blanques. O zz'avez passa à l'ieu, égouta, sala pis poévra. Etindez zzés su cho'p pate sans dépasser chés limites éd cho't tortiére.
Plachez ichi pi  lo quiques morcieux d'beurre pi quiques ronds d'ognon. Ramenez vérs éch mitan chés bords éd pate éd maniére à rmucher chés porions. D'cho'f façon lo oz érez des plis d'pate qu'i sront conme autant d'roéyons. Piquez chu dsu aveuc él pointe d'un coutieu. Chés piots treus i laichront passer cho'v vapeur pour qu'a s'seuve pindant qu'altchuit.
Mettez llé din un four bien cœud, jusqu'à qu'cho'p pate al fuche couleur dora. Finir cho'c tchuisson su chu dsu d'éch foéyer. Cho'f flamique al sro à point quante cho'p pate din nsu al sro ramollie. Conme o, oz érez inne flamique à plos (ch'est-à-dire à plis).
Pour chés épaisseurs éd pate (i y o dz'amateurs) o peut l'rimplacher pér un rond d'pate pu finne d'éch diaméte éd cho't tortiére qu'o l'foait tnir in l'pinchant aveuc cho'p pate d'édsous qu'al a rchu chés poérions.

Marius DEVISMES (Sainneville)